ਹਰਿਆਣਾ ਖੇਲੋ ਇੰਡੀਆ ਯੂਥ ਗੇਮਜ਼ ਦਾ ਜੇਤੂ ਬਣ ਗਿਆ ਹੈ। ਹਰਿਆਣਾ ਦੇ ਮੁੱਕੇਬਾਜ਼ਾਂ ਨੇ ਅੰਤਿਮ ਦਿਨ 10 ਸੋਨ ਤਗਮਿਆਂ ‘ਤੇ ਗੋਲਡਨ ਪੰਚ ਲਗਾ ਕੇ ਖੇਲੋ ਇੰਡੀਆ ਯੁਵਾ ਖੇਡਾਂ ਦੇ ਜੇਤੂ ਬਣਨ ਦਾ ਮਾਣ ਹਾਸਲ ਕੀਤਾ। ਹਰਿਆਣਾ ਨੇ 52 ਸੋਨ ਤਗਮਿਆਂ ਸਮੇਤ ਕੁੱਲ 137 ਤਗਮੇ ਜਿੱਤੇ, ਜਦਕਿ ਮਹਾਰਾਸ਼ਟਰ 45 ਸੋਨ ਤਗਮਿਆਂ ਸਮੇਤ 125 ਤਗਮਿਆਂ ਨਾਲ ਦੂਜੇ ਸਥਾਨ ‘ਤੇ ਰਿਹਾ। ਕਰਨਾਟਕ ਦੇ ਤੈਰਾਕ ਅਨੀਸ਼ ਗੌੜਾ ਨੇ ਸਭ ਤੋਂ ਵੱਧ ਛੇ ਸੋਨ ਤਗਮੇ ਜਿੱਤੇ। ਇਨ੍ਹਾਂ ਖੇਡਾਂ ਵਿੱਚ 25 ਈਵੈਂਟਾਂ ਵਿੱਚ 4700 ਖਿਡਾਰੀਆਂ ਨੇ ਭਾਗ ਲਿਆ, ਜਿਨ੍ਹਾਂ ਵਿੱਚ 2262 ਲੜਕੀਆਂ ਸਨ।
ਦੱਸ ਦਈਏ ਕਿ ਹਰਿਆਣਾ ਅਤੇ ਮਹਾਰਾਸ਼ਟਰ ਸੋਮਵਾਰ ਸਵੇਰੇ 41-41 ਗੋਲਡ ਨਾਲ ਬਰਾਬਰ ‘ਤੇ ਸਨ । ਮਹਾਰਾਸ਼ਟਰ ਦੇ ਲੜਕਿਆਂ ਨੇ ਸਵੇਰੇ ਲੜਕਿਆਂ ਅਤੇ ਲੜਕੀਆਂ ਵਿੱਚ ਮਲਖੰਬ ਪੋਲ ਅਤੇ ਖੋ-ਖੋ ਵਿੱਚ ਸੋਨ ਤਗ਼ਮਾ ਜਿੱਤ ਕੇ ਹਰਿਆਣਾ ਨੂੰ ਪਛਾੜ ਦਿੱਤਾ। ਹਰਿਆਣਾ ਦੀਆਂ ਕੁੜੀਆਂ ਨੇ ਫਿਰ ਹੈਂਡਬਾਲ ਦੇ ਰੋਮਾਂਚਕ ਮੁਕਾਬਲੇ ਵਿੱਚ ਹਿਮਾਚਲ ਪ੍ਰਦੇਸ਼ ਨੂੰ 29-28 ਨਾਲ ਹਰਾ ਕੇ ਸੋਨ ਤਗ਼ਮੇ ਦਾ ਫਰਕ ਘੱਟ ਕਰ ਲਿਆ। ਪਰ ਜਿਵੇਂ ਹੀ ਮੁੱਕੇਬਾਜ਼ੀ ਦੀ ਵਾਰੀ ਆਈ, ਹਰਿਆਣਾ ਨੇ ਮਹਾਰਾਸ਼ਟਰ ਨੂੰ ਬਹੁਤ ਪਿੱਛੇ ਛੱਡ ਦਿੱਤਾ ਹੈ। ਹਰਿਆਣਾ ਦੀਆਂ ਅੱਠ ਕੁੜੀਆਂ ਵਿੱਚੋਂ ਛੇ ਅਤੇ ਪੰਜ ਵਿੱਚੋਂ ਚਾਰ ਲੜਕਿਆਂ ਨੇ ਸੋਨ ਤਗਮੇ ਜਿੱਤ ਕੇ ਮਹਾਰਾਸ਼ਟਰ ਨੂੰ ਬਹੁਤ ਪਿੱਛੇ ਛੱਡ ਦਿੱਤਾ। ਹਰਿਆਣਾ ਨੇ ਮੁੱਕੇਬਾਜ਼ੀ ਵਿੱਚ 10 ਅਤੇ ਕੁਸ਼ਤੀ ਵਿੱਚ 16 ਸੋਨ ਤਗ਼ਮੇ ਜਿੱਤ ਕੇ ਦਬਦਬਾ ਬਣਾਇਆ।