ਲੋਕ ਘੋਲਾਂ ਵਜੋਂ ਜਾਣੇ ਜਾਂਦੇ ਮਾਲਵੇ ਦੇ ਪ੍ਰਸਿੱਧ ਪਿੰਡ ਕੁੱਸਾ ਜੋ ਏਕਤਾ ਅਤੇ ਭਾਈਚਾਰੇ ਦੀ ਹਮੇਸ਼ਾ ਵੱਡੀ ਮਿਸਾਲ ਕਾਇਮ ਕਰਦਾ ਰਿਹਾ ਹੈ। ਪਿੰਡ ਕੁੱਸਾ ਵਿਚ ਲਗਾਤਾਰ ਪਿਛਲੇ ਕਰੀਬ 21 ਸਾਲ ਤੋਂ ਬਜ਼ੁਰਗਾਂ ਦੀ ਮੌਤ ਹੋ ਜਾਣ ਤੋਂ ਬਾਅਦ ਕੀਤੇ ਜਾਣ ਵਾਲੇ ਫ਼ਿਜ਼ੂਲ ਖਰਚੇ ਜਲੇਬੀਆਂ, ਪਕਾਉਣੀਆਂ ਜਾਂ ਹੋਰ ਮਹਿੰਗੇ ਲੈਣ ਦੇਣ ਕਰਨੇ ਬੰਦ ਹਨ ਕਿਉਂਕਿ ਪਿੰਡ ਦੇ ਲੋਕ ਇਹ ਗੱਲ ਮਹਿਸੂਸ ਕਰਦੇ ਸਨ ਕਿ ਬਜ਼ੁਰਗਾਂ ਦਾ ਪਰਿਵਾਰ ਵਿਚੋਂ ਚਲੇ ਜਾਣਾ ਖ਼ੁਸ਼ੀ ਦੀ ਗੱਲ ਨਹੀਂ ਹੁੰਦੀ ਬਲਕੇ ਪਰਿਵਾਰ ਨੂੰ ਵੱਡਾ ਘਾਟਾ ਹੁੰਦਾ ਹੈ।
ਇਸ ਗੱਲ ’ਤੇ ਅੱਜ ਤੋਂ ਕਰੀਬ 21 ਸਾਲ ਪਹਿਲਾਂ ਪਿੰਡ ਦੇ ਲੋਕਾਂ ਨੇ ਵੱਡਾ ਇਕੱਠ ਕਰ ਕੇ ਇਤਿਹਾਸਿਕ ਫ਼ੈਸਲੇ ਰਾਹੀ ਪਿੰਡ ਕੁੱਸਾ ਦੇ ਨੌਜਵਾਨਾਂ ਨੇ ਨਗਰ ਸੁਧਾਰ ਕਮੇਟੀ ਦਾ ਗਠਨ ਕਰਕੇ ਗ੍ਰਾਮ ਪੰਚਾਇਤ ਦੇ ਸਹਿਯੋਗ ਦੇ ਨਾਲ ਪਿੰਡ ਵਿਚ ਇਕ ਰੂਲ ਬਣਾਇਆ ਕਿ ਬਜ਼ੁਰਗਾਂ ਦੀ ਮੌਤ ਸਮੇਂ ਕੋਈ ਵੀ ਮਿੱਠਾ ਪਕਵਾਨ ਜਿਵੇਂ ਜਲੇਬੀਆਂ ਤੇ ਮਠਿਆਈਆਂ ਨਹੀਂ ਬਣਾਈਆਂ ਜਾਣਗੀਆਂ ਅਤੇ ਹਰ ਮੌਤ ਦਾ ਭੋਗ ਵੀ ਗੁਰਦੁਆਰਾ ਸਾਹਿਬ ਦੇ ਵਿਚ ਪਾਇਆ ਜਾਵੇਗਾ। ਇਸ ਤੋਂ ਇਲਾਵਾ ਪਿੰਡ ਵਿਚੋਂ ਮੌਤ ਤੋਂ ਬਾਅਦ ਜਾਣ ਵਾਲੀਆਂ ਮਕਾਣਾਂ, ਹਗਾਮੇ ਅਤੇ ਹੋਰ ਸੋਨੇ ਲੀੜੇ ਲੱਤੇ ਦੀ ਫਜ਼ੂਲ ਖਰਚੀ ਨੂੰ ਵੀ ਪਿੰਡ ਦੇ ਲੋਕਾਂ ਨੇ ਕੰਟਰੋਲ ਕਰ ਕੇ ਇਤਿਹਾਸਿਕ ਕੰਮ ਕੀਤਾ ਸੀ, ਜਿਸ ਦੀ ਪੂਰੇ ਪੰਜਾਬ ਵਿਚ ਚਰਚਾ ਹੋਈ ਸੀ, ਪਿੰਡ ਗੁੱਸਾ ਦੇ ਲੋਕਾਂ ਦੇ ਇਸ ਕਦਮ ਦੀ ਬਹੁਤ ਪ੍ਰਸ਼ੰਸਾ ਹੋਈ ਸੀ।
ਹੁਣ ਪਰ ਪਿੰਡ ਕੁੱਸਾ ਦੇ ਲੋਕਾਂ ਨੇ ਬੀਤੇ ਦਿਨੀ ਪਿੰਡ ਵਿਚ ਹੋਈ ਭਾਰੀ ਗੜੇਮਾਰੀ ਦੀ ਤਬਾਹੀ ਨਾਲ ਹੋਏ ਫ਼ਸਲਾਂ ਦੇ ਨੁਕਸਾਨ ਤੋਂ ਬਾਅਦ ਇਕ ਹੋਰ ਨਵਾਂ ਵੱਡਾ ਫ਼ੈਸਲਾ ਕੀਤਾ ਹੈ ਕਿ ਪਿੰਡ ਵਿਚ ਜੋ ਜ਼ਮੀਨਾਂ ਠੇਕੇ ’ਤੇ ਕਿਸਾਨਾਂ ਵਲੋਂ ਲਈਆਂ ਜਾਂਦੀਆਂ ਹਨ, ਉਨ੍ਹਾਂ ਦਾ ਰੇਟ ਦੋ ਸਾਲ ਲਈ 65 ਹਜ਼ਾਰ ਰੁਪਏ ਪਰ ਏਕੜ (ਮੋਟਰ ਵਾਲੀ) ਤੇ ਪਾਣੀ ਤੋਂ ਬਿਨਾਂ ਮਾਰੂ ਜ਼ਮੀਨਾਂ ਦਾ ਠੇਕਾ ਮਾਮਲਾ 50 ਹਜ਼ਾਰ ਰੁਪਏ ਪ੍ਰਤੀ ਏਕੜ ਰਖਿਆ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਬੀਤੇ ਦਿਨੀਂ ਹੋਈ ਭਾਰੀ ਗੜ੍ਹੇਮਾਰੀ ਨਾਲ ਪਿੰਡ ਕੁੱਸਾ ਵਿਚ ਵੀ ਵੱਡੀ ਪੱਧਰ ’ਤੇ ਮੂੰਗੀ, ਸਬਜ਼ੀਆਂ ਤੇ ਮੱਕੀ ਦੀ ਫ਼ਸਲ ਦਾ ਨੁਕਸਾਨ ਹੋਇਆ ਹੈ, ਇਸ ਨੁਕਸਾਨ ਦੇ ਚਲਦੇ ਹੋਏ ਸਮੂਹ ਗ੍ਰਾਮ ਪੰਚਾਇਤ ਪਿੰਡ ਕੁੱਸਾ ਅਤੇ ਪਿੰਡ ਵਾਸੀਆਂ ਨੇ ਪਿੰਡ ਦੀ ਸੱਥ ਵਿਚ ਵੱਡਾ ਇਕੱਠ ਕਰ ਕੇ ਆਰਥਕ ਮੰਦਹਾਲੀ ਵਿਚੋਂ ਲੰਘ ਰਹੇ ਕਿਸਾਨਾਂ ਦੇ ਹੱਕ ਵਿਚ ਫ਼ੈਸਲਾ ਕੀਤਾ ਹੈ।
