ਵਾਹਨ ਖ਼ਰੀਦਣ ਦੀ ਯੋਜਨਾ ਬਣਾ ਰਹੇ ਲੋਕਾਂ ਨੂੰ ਵਧ ਕੀਮਤਾਂ ਅਦਾ ਕਰਨ ਦਾ ਝਟਕਾ ਲੱਗਾ ਸਕਦਾ ਹੈ ।ਕਿਉਂਕੀ ਉਤਪਾਦਨ ਲਾਗਤ ’ਚ ਵਾਧੇ ਦੇ ਦਰਮਿਆਨ ਟਾਟਾ ਮੋਟਰਸ, ਹੌਂਡਾ ਅਤੇ ਰੇਨੋ ਵਰਗੀਆਂ ਵਾਹਨ ਕੰਪਨੀਆਂ ਨਵੇਂ ਸਾਲ ਯਾਨੀ ਜਨਵਰੀ ਤੋਂ ਆਪਣੇ ਵਾਹਨਾਂ ਦੇ ਮੁੱਲ ਵਧਾਉਣ ’ਤੇ ਵਿਚਾਰ ਕਰ ਰਹੀਆਂ ਹਨ। ਬਾਜ਼ਾਰ ਦੀ ਮੋਹਰੀ ਕੰਪਨੀ ਮਾਰੂਤੀ ਸੁਜ਼ੂਕੀ ਅਤੇ ਲਗਜ਼ਰੀ ਕਾਰ ਕੰਪਨੀ ਆਡੀ ਤੇ ਮਰਸਿਡੀਜ਼-ਬੈਂਜ਼ ਅਗਲੇ ਮਹੀਨੇ ਤੋਂ ਆਪਣੇ ਵਾਹਨਾਂ ਦੀਆਂ ਕੀਮਤਾਂ ’ਚ ਵਾਦੇ ਦਾ ਐਲਾਨ ਪਹਿਲਾਂ ਹੀ ਕਰ ਚੁੱਕੀਆਂ ਹਨ। ਮਾਰੂਤੀ ਨੇ ਕਿਹਾ ਹੈ ਕਿ ਜਨਵਰੀ 2022 ਤੋਂ ਉਸ ਦੇ ਵਾਹਨਾਂ ਦੇ ਮੁੱਲ ਵਧਣਗੇ। ਵੱਖ-ਵੱਖ ਮਾਡਲਾਂ ਦੀਆਂ ਕੀਮਤਾਂ ’ਚ ਵਾਧਾ ਵੱਖ-ਵੱਖ ਹੋਵੇਗਾ।
ਉਥੇ ਹੀ ਮਰਸਿਡੀਜ਼-ਬੈਂਜ਼ ਨੇ ਕਿਹਾ ਹੈ ਕਿ ਉਸ ਦੇ ਚੋਣਵੇਂ ਮਾਡਲਾਂ ਦੇ ਮੁੱਲ 2 ਫ਼ੀਸਦੀ ਤੱਕ ਵਧ ਜਾਣਗੇ। ਦੂਜੇ ਪਾਸੇ ਆਡੀ ਨੇ 1 ਜਨਵਰੀ, 2022 ਤੋਂ ਆਪਣੀ ਸਮੁੱਚੀ ਮਾਡਲ ਲੜੀ ਦੀਆਂ ਕੀਮਤਾਂ ’ਚ 3 ਫ਼ੀਸਦੀ ਤੱਕ ਦੇ ਵਾਧੇ ਦਾ ਐਲਾਨ ਕੀਤਾ ਹੈ। ਕੀਮਤ ਵਾਧੇ ਬਾਰੇ ਸੰਪਰਕ ਕਰਨ ’ਤੇ ਟਾਟਾ ਮੋਟਰਸ ਦੇ ਪ੍ਰਧਾਨ ਸ਼ੈਲੇਸ਼ ਚੰਦਰਾ ਨੇ ਕਿਹਾ, ‘‘ਜਿਣਸਾਂ ਦੇ ਮੁੱਲ, ਕੱਚੇ ਮਾਲ ਅਤੇ ਹੋਰ ਲਾਗਤਾਂ ’ਚ ਲਗਾਤਾਰ ਵਾਧਾ ਜਾਰੀ ਹੈ। ਲਾਗਤ ’ਚ ਇਸ ਵਾਧੇ ਦੇ ਪ੍ਰਭਾਵ ਨੂੰ ਅੰਸ਼ਿਕ ਰੂਪ ਨਾਲ ਘੱਟ ਕਰਨ ਲਈ ਨੇੜ ਭਵਿੱਖ ’ਚ ਕੀਮਤਾਂ ’ਚ ਉਚਿਤ ਵਾਧੇ ਤੋਂ ਬਚਿਆ ਨਹੀਂ ਜਾ ਸਕਦਾ। ਟਾਟਾ ਮੋਟਰਸ ਘਰੇਲੂ ਬਾਜ਼ਾਰ ’ਚ ਪੰਜ, ਨੈਕਸਾਨ ਅਤੇ ਹੈਰਿਅਰ ਵਰਗੇ ਵਾਹਨਾਂ ਦੀ ਵਿਕਰੀ ਕਰਦੀ ਹੈ। ਇਸ ’ਚ ਹੌਂਡਾ ਕਾਰਸ ਇੰਡੀਆ ਨੇ ਵੀ ਕਿਹਾ ਹੈ ਕਿ ਉਹ ਨੇੜ ਭਵਿੱਖ ’ਚ ਕੀਮਤਾਂ ’ਚ ਵਾਧੇ ’ਤੇ ਵਿਚਾਰ ਕਰ ਰਹੀ ਹੈ।
